Një ngjarje tronditëse ka ndodhur në Ekuador, ku arbitri i futbollit Javier Ortega, 48 vjeç, është vrarë me armë zjarri gjatë zhvillimit të një ndeshjeje në qytetin Pasaje.
Sipas dëshmitarëve, persona të armatosur kanë hyrë në fushë gjatë takimit dhe i janë afruar arbitrit, duke hapur zjarr ndaj tij para syve të lojtarëve dhe tifozëve. Ngjarja ka shkaktuar panik të madh, ndërsa ndeshja është ndërprerë menjëherë dhe të pranishmit janë larguar me shpejtësi për t’i shpëtuar situatës.
Shërbimet e emergjencës kanë mbërritur në vendngjarje, por pavarësisht ndërhyrjes, arbitri është shpallur i vdekur në vend.
Policia lokale ka rrethuar zonën dhe ka nisur hetimet për zbardhjen e plotë të ngjarjes. Po analizohen pamjet filmike të siguruara nga dëshmitarët, ndërsa disa persona janë marrë në pyetje, por deri tani nuk raportohet për të arrestuar.
Autoritetet dyshojnë se bëhet fjalë për një atentat të mirëorganizuar, megjithëse motivet mbeten ende të paqarta.
Ngjarja ka shkaktuar reagime të forta në komunitetin sportiv në Ekuador, ku organizatat e arbitrave kanë kërkuar masa më të rrepta sigurie në aktivitetet sportive. Ndërkohë, klubi organizator ka pezulluar përkohësisht ndeshjet, ndërsa hetimet vijojnë.