Një zjarr ka përfshirë një apartament në lagjen 5 të qytetit të Durrësit, duke shkaktuar panik dhe frikë tek banorët, për shkak të mundësisë që flakët të përhapen edhe në banesa të tjera.
Në vendngjarje kanë shkuar menjëherë forcat zjarrfikëse dhe policia, të cilat kanë ndërhyrë për të kontrolluar situatën dhe për të neutralizuar zjarret. Falë ndërhyrjes së shpejtë, zjarri po vihet nën kontroll dhe nuk raportohet për persona të lënduar.
Megjithatë, dëmet materiale janë të konsiderueshme. Policia po vijon hetimet për të identifikuar shkaqet që kanë shkaktuar rënien e zjarrit dhe për të sqaruar rrethanat e ngjarjes.
Banorët e zonës janë paralajmëruar të qëndrojnë vigjilentë, ndërsa autoritetet po monitorojnë situatën për të parandaluar përhapjen e mëtejshme të flakëve.