Konkursi për Mjekësi është drejt përfundimit, ndërsa ende ka kandidatë që presin të japin provimin e tyre elektronik. Gjatë viteve të shkollës, këta të rinj kanë studiuar me përkushtim për të arritur synimin e tyre, shpesh duke refuzuar sugjerimet e prindërve për të ndjekur programe të tjera jashtë fushës së mjekësisë.
Testi elektronik për mjekësi zgjat një orë dhe çdo raund përfshin 60 kandidatë, të cilët duhet të zgjidhin 50 pyetje nga programi i Biologjisë, Fizikës dhe Kimisë. Kandidatët marrin rezultatet menjëherë pas përfundimit të provimit. Për disa prej tyre, përtej pikëve të arritura në test, më e rëndësishme është zgjedhja e shkollës së dëshiruar, që shpesh tejkalon pritshmëritë dhe dëshirat e prindërve.
Mbi 2,000 të rinj garojnë për 430 vende në degën e Mjekësisë së Përgjithshme. Konkursi përfundon më 23 gusht, ndërsa listat e fituesve do të shpallen më 27 gusht.