Një burrë i dënuar për vrasjen e një pronareje dyqani gjatë një grabitjeje në vitin 1986 u ekzekutua sot në Florida, duke u bërë ekzekutimi i dytë i këtij viti në këtë shtet amerikan.
Melvin Trotter (65) ishte dënuar për vrasje të shkallës së parë pasi mbyti dhe qëlloi me thikë Virgie Langford në dyqanin e saj në Palmetto. Lajmi u raportua nga Sky News.
Dënimi me vdekje për Trotter u dha fillimisht në vitin 1987, por Gjykata Supreme e Floridës konstatoi gabime procedurale dhe urdhëroi rigjykim për fazën e dënimit. Ai u dënua sërish me vdekje në vitin 1993. Ekzekutimi me injeksion vdekjeprurës u krye në orën 18:00 sipas kohës lokale në Burgun Shtetëror të Floridës.
Avokatët e tij apeluan, duke argumentuar se protokollet e ekzekutimit ishin menaxhuar keq dhe se, për shkak të moshës, Trotter duhej të përjashtohej nga dënimi kapital. Gjykata Supreme e SHBA-ve shqyrtoi përpjekjen e fundit për ndryshimin e dënimit, por ekzekutimi vijoi sipas planit.
Sipas dokumenteve gjyqësore, viktima u gjet ende e gjallë nga një shofer kamioni dhe arriti të përshkruante sulmuesin para se të ndërronte jetë në spital. Ajo kishte deklaruar se autori mbante një shenjë identifikimi të kompanisë Tropicana me emrin “Melvin”. Hetuesit gjetën më pas prova materiale që e lidhën Trotter me vendin e krimit, përfshirë një bluzë me njolla gjaku që përputheshin me grupin e gjakut të viktimës dhe një gjurmë dore në frigoriferin e dyqanit.
Ky është ekzekutimi i dytë në Florida këtë vit. I pari ishte Ronald Palmer Heath (64), i dënuar për vrasjen e tregtarit Michael Sheridan në vitin 1989.
Guvernatori i shtetit, Ron DeSantis, mbikëqyri një numër rekord ekzekutimesh gjatë vitit 2025. Sipas të dhënave zyrtare, 19 persona u ekzekutuan me injeksion vdekjeprurës – numri më i lartë vjetor në Florida që nga rikthimi i dënimit me vdekje në Shtetet e Bashkuara në vitin 1976.