Një rrëfim prekës dhe i dhimbshëm erdhi nga Selin Bollati në shtëpinë e Big Brother VIP Albania.
Mes lotësh, ajo tregoi për një nga momentet më të vështira të jetës së saj, kur vëllai i saj, Ono, përjetoi për herë të parë një krizë epileptike – një situatë që e gjeti familjen të papërgatitur dhe të frikësuar.
“Dëgjova shumë ulërima. Atë natë luante Shqipëria një ndeshje shumë të rëndësishme dhe mendova se kishin bërë gol. Por kur dola nga dhoma, pashë që Ono po kalonte një krizë epileptike. Ishim vetëm në shtëpi dhe askush nuk dinte çfarë të bënte”, rrëfeu ajo.
Selin tregoi se frika e shoqëroi për një kohë të gjatë. Krizat i ndodhnin vetëm natën dhe ajo ishte e vetmja që i dëgjonte në momentet e para. Për këtë arsye, nuk arrinte të flinte.
“Çdo natë ulesha dhe lutesha në mënyrën time për të gjetur një zgjidhje, një shpëtim. Doja të isha zgjuar që të reagoja sa më shpejt”, tha ajo me zërin që i dridhej.
Pas një periudhe të vështirë, gjyshërit e saj në Amerikë vendosën ta merrnin Onon për ndihmë mjekësore dhe për të kuptuar më mirë gjendjen e tij. Por largimi i tij për dy vite ishte një tjetër goditje e fortë për Selin.
“Ishte një thyerje shumë e madhe për mua, sepse nuk isha mësuar të jetoja pa prezencën e tij në shtëpi”, përfundoi ajo.
Rrëfimi i saj preku jo vetëm banorët e shtëpisë, por edhe publikun, duke sjellë në vëmendje forcën që shpesh fshihet pas buzëqeshjes.