Instituti i Shëndetit Publik ka reaguar zyrtarisht pas raportimeve në disa media për një shpërthim të fruthit në kopshtet e fëmijëve në Tiranë.
Përmes një deklarate publike, institucioni sqaron se nuk ka asnjë shpërthim të fruthit në asnjë kopsht apo institucion parashkollor në qytetin e Tiranës, duke i cilësuar raportimet si të pasakta.
Instituti u bën thirrje qytetarëve që të informohen vetëm nga burime zyrtare dhe të shmangin përhapjen e informacioneve të pakonfirmuara, të cilat mund të krijojnë panik të panevojshëm në publik.
Gjithashtu, apelohet ndaj prindërve që të respektojnë kalendarin kombëtar të vaksinimit dhe të sigurojnë vaksinimin në kohë të fëmijëve të tyre, duke theksuar se vaksinimi mbetet masa më e sigurt dhe më efektive për parandalimin e sëmundjeve infektive.
Instituti i Shëndetit Publik garanton se do të vijojë të informojë qytetarët në mënyrë transparente dhe të përgjegjshme për çdo zhvillim që lidhet me situatën epidemiologjike.