TikTok po përballet me një periudhë të vështirë në Shtetet e Bashkuara, teksa gjithnjë e më shumë përdorues amerikanë po heqin dorë nga rrjeti social.
Pas krijimit të një sipërmarrjeje të përbashkët të dedikuar tregut amerikan, kompania ka pranuar se po përjeton probleme serioze operacionale, të lidhura me infrastrukturën kritike të IT-së ku mbështetet platforma.
Sipas analistëve të “Sensor Tower”, numri i çinstalimeve të TikTok nga përdoruesit amerikanë është rritur me rreth 150%. Studiuesit e CNBC-së theksojnë se kjo prirje lidhet si me vështirësitë teknike në përdorimin e aplikacionit, ashtu edhe me krijimin e entitetit të ri amerikan të udhëhequr nga Adam Presser, ish-drejtori operativ i TikTok.
Ndërkohë, kriza e TikTok duket se po hap rrugë për rivalët. Sipas të dhënave nga kompania “App Figures”, shkarkimet e aplikacionit alternativ UpScrolled janë rritur ndjeshëm, duke e çuar atë në listat e aplikacioneve më të shkarkuara në SHBA, Mbretërinë e Bashkuar dhe Australi.
Aplikacioni, i krijuar nga zhvilluesi australian Issam Hijazi, ka kaluar nga disa qindra në mbi 41 mijë shkarkime brenda pak ditësh dhe kujton versionet e hershme të Instagram.
Nuk është hera e parë që trazirat rreth TikTok nxjerrin në pah platforma të reja. Në fillim të vitit 2025, aplikacioni kinez RedNote fitoi popullaritet në SHBA, pas diskutimeve për një bllokim të mundshëm të TikTok nga Uashingtoni.