Kryeministri i Kanadasë, Mark Carney, i është përgjigjur ashpër deklaratave të Presidentit amerikan Donald Trump, duke theksuar se Kanadaja ekziston dhe lulëzon jo falë Shteteve të Bashkuara, por falë identitetit dhe vlerave të saj.
“Kanadaja lulëzon sepse ne jemi kanadezë. Ne jemi zotër të shtëpisë sonë. Ky është vendi ynë dhe kjo është e ardhmja jonë,” deklaroi Carney nga Kebeku, duke shtuar se synimi i tij është ta bëjë Kanadanë një “fener” në një kohë kur demokracia globale është në rënie.
Ai theksoi se vendi i tij mund të tregojë se ekziston një rrugë tjetër përballë autoritarizmit dhe përjashtimit. “Rrjedha e historisë nuk është e destinuar t’i përkulet autoritarizmit, por progresit,” u shpreh kryeministri kanadez.
Deklaratat e Carney vijnë pasi dy ditë më parë, gjatë Forumit Ekonomik Botëror në Davos, ai foli për përçarjen e rendit global dhe u bëri thirrje “fuqive të mesme” që të bashkohen përballë fuqive hegjemonike. Fjalimi i tij nxiti reagimin e Donald Trump, i cili deklaroi se Kanadaja ekziston “falë Shteteve të Bashkuara” dhe sugjeroi sërish idenë që ajo të bëhej shteti i 51-të amerikan.
Në kundërpërgjigje, Carney theksoi historinë unike të Kanadasë, të ndërtuar mbi trashëgiminë indigjene, franceze dhe britanike, duke e cilësuar vendin si një shembull të hapjes, sigurisë dhe forcës me parime.
Akademikë dhe analistë politikë në Kanada e kanë vlerësuar qëndrimin e Carney-t si të guximshëm. Sipas profesoreshës së shkencave politike Laura Stevenson, fjalimi ka nxitur krenari te kanadezët, ndërsa profesori Jack Cunningham theksoi se Carney është një nga të paktët udhëheqës që ka guxuar t’i dalë ballë hapur Trump-it.
Marrëdhëniet mes SHBA-së dhe Kanadasë mbeten të tensionuara, veçanërisht pas vendosjes së tarifave nga administrata Trump ndaj produkteve kanadeze dhe postimeve provokuese të presidentit amerikan në rrjetet sociale, përfshirë imazhe të krijuara me Inteligjencë Artificiale që sugjerojnë zgjerim territorial të SHBA-së.
After Trump said yesterday that "Canada lives because of the US," Mark Carney ends his speech by taking a shot back.
“Canada doesn't live because of the US, Canada thrives because we are Canadian" pic.twitter.com/MeKQILLmm6
— Goon (@Goontify) January 22, 2026