Këshilli i Ministrave ka përcaktuar sot kriteret dhe procedurat për përzgjedhjen, emërimin, vlerësimin, disiplinën dhe shkarkimin e Inspektorit të Përgjithshëm. Vendimi parashikon krijimin e një komisioni ad hoc të përbërë nga një përfaqësues i institucionit që ka në varësi Inspektoratin e Përgjithshëm, një përfaqësues i Departamentit të Administratës Publike dhe një përfaqësues i Ministrisë së Drejtësisë.
Komisioni shqyrton dokumentacionin e kandidatëve dhe zhvillon intervistat brenda 15 ditëve kalendarike nga përfundimi i afatit të aplikimeve. Vlerësimi i kandidatëve bëhet në një total prej 100 pikësh, ku 60 pikë i atribuohen përvojës profesionale dhe 40 pikë intervistës së strukturuar. Pas përfundimit të procesit të vlerësimit, komisioni harton listën përfundimtare të kandidatëve të kualifikuar, të renditur sipas pikëve të grumbulluara, dhe e dorëzon te sekretari i përgjithshëm i institucionit përgjegjës brenda tre ditëve kalendarike. Gjatë gjithë procesit, komisioni garanton barazi, objektivitet dhe transparencë.
Vendimi parashikon gjithashtu procedurat disiplinore në rast se ka indicie për shkelje. Sekretari i institucionit mund të nisë procedurat administrative dhe të njoftojë Inspektorin e Përgjithshëm për fillimin e hetimit. Një grup i posaçëm mbledh prova, dëshmi dhe raportime për shkeljen e dyshuar, ndërsa sekretari i institucionit propozon masat disiplinore për titullarin e institucionit në varësi të rrethanave të konstatuara. Lirimi dhe shkarkimi i Inspektorit të Përgjithshëm bëhet me vendim të Këshillit të Ministrave, me propozim të titullarit të institucionit përgjegjës.
Ky vendim synon të forcojë transparencën, profesionalizmin dhe llogaridhënien në menaxhimin e Inspektoratit të Përgjithshëm.