TIRANË– Ministri i Brendshëm, Ervin Hoxha ka reaguar përmes një postimi në Facebook pas arrestimit të shefit të antidrogës në Policinë e Durrësit, Gazmir Preçi.
Pas hetimeve të SPAK u zbulua se Preçi ishte pjesë e një skeme shantazhi dhe gjobëvënieje të një pronari të një klubi nate te Ura e Dajlanit. Vlen të theksohet se kjo nuk është hera e parë që Preçi përballet me drejtësinë për akuzat e shfrytëzimit të detyrës.
Tre vite më parë, në 2021 Gazmir Preçi mbante postin e shefit të Krimieve në Policinë e Mallakastrës u arrestua së bashku me 4 zyrtarë të tjerë të policisë së Fierit në kuadër të një hetimi për lejimin e kultivimit të kanabisit në afërsi të Urës së lumit Vjosë, në Poçem të Mallakastrës.
Reagimi i Ministrit të Brendshëm Ervin Hoxha
Operacioni i AMP-së, në bashkëpunim me SPAK, është mesazh i qartë për ata punonjës policie të cilitdo niveli qofshin, që do të tentojnë të cenojnë besimin e qytetarëve tek Policia, duke u hequr si padronë të qytetarëve dhe bizneseve, dhe jo si shërbëtorë të ligjit, do të marrin ndëshkimin më të ashpër ligjor.
Mbështes dhe inkurajoj AMP-në dhe agjencitë e tjera ligjzbatuese, si dhe nxis dhe garantoj qytetarët dhe bizneset të denoncojnë raste të tilla, sepse vetëm bashkërisht arrijmë të realizojmë objektivin madhor, për të pasur një Polici sa më profesionale dhe me integritet të lartë moral e ligjor!