Policia e Tiranës ka arrestuar një 23-vjeçar, i cili u kap në posedim të mbi 1 kilogrami lëndë narkotike kanabis në formë xhelatine. Arrestimi u krye në rrugën “5 Maji”, në kuadër të një operacioni policor të koduar “Shape”.
Sipas njoftimit zyrtar, i arrestuari është shtetasi D. C., 23 vjeç, banues në Dibër. Gjatë kontrollit fizik dhe kontrollit në banesën e tij, shërbimet e Policisë sekuestruan 1 kg e 54 gramë kanabis në trajtë xhelatine, me një vlerë të përafërt rreth 10 mijë euro.
Nga hetimet paraprake dyshohet se lënda narkotike është trafikuar nga Kanadaja. Policia bën me dije se operacioni u realizua falë informacioneve të siguruara në rrugë operative dhe bashkëpunimit mes Komisariatit të Policisë Nr. 4 dhe Seksionit të Narkotikëve.
Hetimet vijojnë për dokumentimin e plotë të veprimtarisë kriminale dhe për identifikimin e personave të tjerë që mund të jenë të përfshirë. Materialet procedurale i janë referuar Prokurorisë për veprime të mëtejshme ligjore.