Islanda ka njoftuar tërheqjen e saj nga Eurovision 2026, duke iu bashkuar Spanjës, Irlandës, Sllovenisë dhe Holandës. Vendimet e këtyre vendeve vijnë pas konfirmimit zyrtar të pjesëmarrjes së Izraelit në konkurs, që do të mbahet në Vjenë në maj të vitit të ardhshëm, në kuadër të edicionit të 70-vjetorit të festivalit.
Transmetuesi kombëtar islandez RÚV njoftoi se pjesëmarrja e transmetuesit publik izraelit, Kan, ka krijuar tensione midis anëtarëve të Unionit Europian të Transmetimeve (EBU) dhe publikut të gjerë. Para këtij vendimi, Islanda kishte deklaruar se po shqyrtonte mundësinë e tërheqjes, duke pritur diskutimin e bordit drejtues, i cili u zhvillua vetëm pak orë para afatit për konfirmimin e pjesëmarrjes së vendit.
Izraeli ka marrë pjesë në Eurovision që nga viti 1973 si anëtar i EBU-së, duke fituar katër herë, më së fundi në vitin 2018, dhe duke u renditur i dyti në edicionin e vitit 2025. Megjithatë, prezenca e tij këtë vit është bërë burim tensioni për shkak të situatës në Gaza dhe shqetësimeve mbi proceset e votimit, përfshirë pretendime se qeveria izraelite ka tentuar të ndikojë në votimin publik.
Pasi një samit i EBU-së javën e kaluar miratoi një sërë masash për të garantuar integritetin e votimit, shumica e vendeve konfirmuan se do të marrin pjesë në Vjenë. Megjithatë, disa transmetues, duke përfshirë Spanjën, kërkuan një votim për pjesëmarrjen e Izraelit, i cili nuk u miratua, duke rezultuar në vendimet për tërheqje.
Drejtori ekzekutiv i Kan, Golan Yochpaz, kritikoi bojkotin si një hap që mund të shndërrohet në një “bojkot kulturor” me pasoja të paparashikueshme, duke theksuar se ky veprim mund të ndikojë jo vetëm në Izrael, por edhe në reputacionin e konkursit në 70-vjetorin e tij.