Numri i klinikave dentare në vend është rritur ndjeshëm vitet e fundit, paralelisht me rritjen e turizmit dentar. Krahas shërbimeve cilësore që ofrojnë shumë prej tyre, një pjesë tjetër rezulton se operon në kundërshtim me ligjin dhe standardet shëndetësore.
Gjatë vitit 2024, Inspektorati Shëndetësor Shtetëror (ISHSH) ka kryer 583 inspektime dhe riinspektime në klinika dhe laboratorë dentarë, publikë dhe jopublikë, ku janë evidentuar shkelje të rënda.
Sipas raportit, gjashtë klinika dentare janë gjobitur me nga 50 mijë lekë, pasi ushtronin aktivitetin pa licencë nga Qendra Kombëtare e Licencimit. Katër klinika të tjera janë ndëshkuar me të njëjtën vlerë gjobe, sepse mjekët nuk kishin rinovuar lejen e ushtrimit të profesionit, e cila u kishte skaduar.
Kontrollet kanë zbuluar gjithashtu një sërë parregullsish të tjera, kryesisht mungesë të kushteve higjieno-sanitare në disa klinika dhe laboratorë, të cilat raporti nuk i identifikon me emra.
Në total, ISHSH ka vendosur 11 gjoba dhe 38 paralajmërime gjatë inspektimeve të këtij viti.
Këto gjetje ndjekin raste të mëparshme problematike. Vetëm pak kohë më parë, policia në Tiranë zbuloi tre klinika dentare jopublike ku përdorej aparaturë dhe medikamente të skaduara ose me origjinë të dyshimtë, duke vënë në rrezik pacientët.