Shqipëria kremton sot 113-vjetorin e shpalljes së Pavarësisë, një nga datat më të rëndësishme të historisë sonë kombëtare. Më 28 Nëntor 1912, në Vlorë, Kuvendi Kombëtar i drejtuar nga Ismail Qemali shpalli pavarësinë e vendit, duke vulosur përpjekjet shekullore për liri dhe shtet më vete. Në këtë akt historik morën pjesë 83 delegatë nga të gjitha trevat shqiptare, prej të cilëve 40 nënshkruan Aktin e Pavarësisë.
Kjo ditë lidhet edhe me një tjetër moment të lavdishëm: më 28 Nëntor 1443, Skënderbeu çliroi Krujën dhe ngriti flamurin në kalanë e qytetit, ngjarje që historia e quan “Nëntori i dytë”.
Ismail Qemali mbërriti në Shqipëri më 21 nëntor 1912, pasi ishte nisur nga Triestja. Fillimisht parashihej që flamuri të ngrihej në Durrës, por situata e tensionuar e kohës e zhvendosi aktin historik në Vlorë, ku ai telegrafoi delegatët nga mbarë vendi për t’u mbledhur. Ndërkohë, teksa forcat serbe avanconin drejt qendrës së vendit, qytete si Elbasani, Tirana, Durrësi, Kavaja, Peqini dhe Lushnja ngritën flamurin përpara shpalljes në Vlorë.
Shpallja e Pavarësisë i dha fund sundimit gati pesëshekullor osman dhe krijoi themelet për zhvillimin politik, ekonomik dhe kulturor të shtetit shqiptar.
Data 28 nëntor mbetet simbol i historisë kombëtare edhe për ngjarje të tjera të rëndësishme: nisjen e transmetimeve të Radio Tiranës në vitin 1938 dhe lindjen e heroit Adem Jashari në vitin 1955. Që prej vitit 2017, kjo ditë është festë zyrtare edhe në Kosovë, e shpallur si “Dita e Shqiptarëve”.