Organizatat e dala nga lufta e Ushtrisë Çlirimtare të Kosovës po zhvillojnë sot, në orën 13:00, një protestë para Asamblesë Parlamentare të Këshillit të Europës në Strasburg, në mbështetje të ish-krerëve të UÇK-së, të cilët sipas tyre po mbahen padrejtësisht në Hagë.
Kryetari i OVL-UÇK, Hysni Gucati, tha se qëllimi i kësaj proteste është kërkesa për drejtësi dhe rikujtimi për institucionet europiane se, sipas tij, Gjykata Speciale u ngrit mbi “gënjeshtra të senatorit zviceran Dick Marty”. Ai theksoi se pret pjesëmarrje të gjerë nga diaspora shqiptare.
Gucati njoftoi se të gjithë anëtarëve të Parlamentit të Këshillit të Europës do t’u dërgohet një letër shoqëruar me dokumentacion, ku, sipas tij, paraqiten shkeljet e Gjykatës Speciale dhe padrejtësitë ndaj ish-udhëheqësve të UÇK-së, të cilët prej pesë vitesh mbahen nën akuzat për krime lufte.
Protesta të ngjashme janë zhvilluar më herët në Prishtinë, Hagë dhe Tiranë. I pyetur për një protestë të mundshme në Shkup, Gucati u shpreh se aktualisht nuk ka kushte për organizimin e saj për shkak të situatës politike në Maqedoninë e Veriut. Ai shtoi gjithashtu se dëshmia e ish-gjeneralit amerikan Wesley Clark në procesin gjyqësor në Hagë ka qenë “si një bombë” për Gjykatën Speciale.
Nga ana e tij, kreu i BDI-së Ali Ahmeti deklaroi se me “mendje dhe zemër” është sot pranë protestuesve në Strasburg, duke e cilësuar atë vend si pikën ku “filloi padrejtësia ndaj UÇK-së dhe popullit shqiptar”. Ai bëri thirrje për lirimin e ish-krerëve të UÇK-së, duke theksuar se ata kanë qenë aleatë të SHBA-së dhe BE-së dhe vendi i tyre është në Kosovë.
“Pafajësia e tyre është konfirmuar nga miqtë tanë amerikanë dhe europianë në Hagë. Lironi djemtë tanë!”, u shpreh Ahmeti.