Gjatë raportimit të punës së SPAK për vitin 2024 në Parlament këtë të hënë, kreu i Prokurorisë së Posaçme, Altin Dumani, u pyet nga deputeti demokrat Luciano Boçi mbi hetimet ndaj figurave politike.
Deputeti Boçi kërkoi të dinte pse, sipas tij, SPAK ka shmangur kryeministrin Edi Rama, ndërsa ka ndjekur penalisht liderin e opozitës.
Në përgjigje, Dumani theksoi se për SPAK “nuk ka të paprekshëm”.
“Në çdo procedim hetohet për faktin penal dhe më pas për autorët e veprës penale. Prokurorët kryejnë hetimet e nevojshme, dhe për ne nuk kanë rëndësi emrat, por vetëm provat,” deklaroi kreu i SPAK.
Deputeti Boçi e pyeti më tej nëse Dumani kishte dëgjuar për “ultimatumin e kryeministrit Rama që prokurorët e SPAK të mos afrohen tek partitë politike gjatë zgjedhjeve të vitit 2025”.
Dumani u përgjigj duke sqaruar se SPAK ka qenë aktiv në terren dhe ka hetuar me kujdes çdo denoncim:
“Jemi angazhuar në zonat që ju drejtuat dhe jeni kontaktuar nga hetuesit për të dhënë të dhëna, indicie dhe kallëzim penal për çdo rast të denoncuar. Pas verifikimeve, nuk rezultoi të ishte ajo situatë që u raportua publikisht,” shtoi ai.