Fshati piktoresk i Linit, në brigjet e liqenit të Ohrit dhe rreth 20 km larg Pogradecit, është shpallur sot “Ansambël Arkitektonik Urban”, duke u përfshirë në zonën shqiptare të Trashëgimisë Botërore të UNESCO-s. Lajmin e bëri të ditur kryeministri Edi Rama, i cili ndau edhe pamje nga ky vend unik.
“Fshati i bukur i Linit sapo është shpallur ‘Ansambël Arkitektonik Urban’, duke u përfshirë në zonën shqiptare të Trashëgimisë Botërore të UNESCO-s”, deklaroi Rama.
Lini konsiderohet një nga destinacionet më piktoreske të Shqipërisë, që dëshmon lidhjen mes traditës, natyrës dhe veçantive njerëzore. Pas zbulimeve të fundit arkeologjike, fshati njihet gjithashtu si vendbanimi palafit më i hershëm i zbuluar ndonjëherë në Europë, duke tërhequr turistë të huaj dhe studiues.
Një nga thesaret më të çmuara të Linit janë rrënojat e bazilikës paleokristiane, të vendosura në majën e kodrës që mbikqyr fshatin. Shpallja e tij si pjesë e Trashëgimisë Botërore vlerëson peizazhin unik natyror, arkitekturën vernakulare dhe urbanistikën tradicionale.
Fshati ruan strukturën e tij tradicionale me rrugica kalldrëmi, ndërsa arkitektura e tij reflekton teknika dhe materiale vendase, të përshtatura mjeshtërisht me klimën dhe resurset lokale, duke krijuar një model të jashtëzakonshëm të bashkëjetesës komunitare me natyrën.
Ky status i ri është një njohje ndërkombëtare për vlerat historike, kulturore dhe natyrore të zonës së Pogradecit dhe forcon pozicionin e Linit si një destinacion turistik dhe arkeologjik të rëndësishëm.