Shqipëria vijon të tërheqë gjithnjë e më shumë vizitorë të huaj, duke forcuar pozicionin e saj si një nga destinacionet më të preferuara turistike në Ballkan.
Sipas të dhënave të publikuara nga INSTAT, gjatë muajit shtator 2025 në vend kanë hyrë gjithsej 1.965.601 shtetas shqiptarë dhe të huaj, duke shënuar një rritje prej 9,5% krahasuar me të njëjtën periudhë të një viti më parë.
Numri i turistëve të huaj që kanë vizituar Shqipërinë ka arritur në 1.259.684, me një rritje prej 9,9% krahasuar me shtatorin e vitit 2024. Ky trend konfirmon zgjatjen e sezonit turistik përtej muajve të verës dhe rritjen e konkurrueshmërisë së ofertës turistike shqiptare në tregjet ndërkombëtare.
Nga ana tjetër, gjatë së njëjtës periudhë janë regjistruar 2.127.386 dalje nga territori shqiptar, prej të cilave 1.354.731 kanë qenë turistë të huaj – një rritje me 10,2% në raport me një vit më parë.
Të dhënat tregojnë se 95% e vizitorëve të huaj vijnë nga Evropa, ku Evropa Jugore përbën 69% të hyrjeve, e ndjekur nga Evropa Perëndimore (12%) dhe Evropa Qendrore/Lindore (11%).
Në 98% të rasteve, qëllimi i hyrjes së të huajve në vend është për arsye personale, ndërsa hyrjet për qëllime biznesi dhe profesionale janë rritur me 15,3% krahasuar me një vit më parë.
Sipas INSTAT, Shqipëria po konsolidohet si një destinacion turistik gjithëvjetor, falë përmirësimit të infrastrukturës, rritjes së kapaciteteve akomoduese dhe diversifikimit të ofertës turistike në të gjithë territorin.