Seanca plenare në Kuvend u shoqërua me debate të forta dhe tensione mes mazhorancës dhe opozitës, duke sjellë shtyrjen e dy çështjeve më të rëndësishme politike – Reformës Zgjedhore dhe asaj Territoriale.
Pas miratimit të disa pikave të rendit të ditës me 73 votat e Partisë Socialiste, kryeparlamentari Niko Peleshi njoftoi kalimin në diskutimin për Reformën Zgjedhore. Në këtë moment, deputetët e opozitës kundërshtuan procedurën, duke kërkuar shtyrjen e votimit.
Kreu i grupit parlamentar të PS-së, Taulant Balla, ndërhyri duke pranuar që rendi i ditës të shtyhej për në seancën e 30 tetorit, derisa të arrihej dakordësi me opozitën. Ai theksoi se ishte arritur një marrëveshje paraprake, por për shkak të kundërshtive të reja të opozitës, PS vendosi të tërhiqej përkohësisht.
E njëjta situatë u përsërit edhe për Reformën Territoriale. Edhe pse Balla deklaroi se PS ishte e gatshme të pranonte të gjitha amendamentet e dorëzuara nga Partia Demokratike, opozita refuzoi të votonte.
Në përfundim, me 73 vota kundër dhe 37 pro, Kuvendi vendosi të shtyjë për në datën 30 tetor votimin për ngritjen e Komisioneve të Posaçme për Reformën Zgjedhore dhe atë Territoriale.