Presidenti i Federatës Shqiptare të Futbollit, Armand Duka, u shfaq i emocionuar pas fitores historike të Kombëtares ndaj Serbisë në transfertë, duke e cilësuar rezultatin si “të domosdoshëm për ëndrrën botërore”.
“Jemi në ekzaltimin e festës, nuk mbaj mend çfarë i kam thënë… Ka qenë një rezultat i mirë, sportivisht i domosdoshëm. Çunat dhanë maksimumin. Akoma s’jemi gjysma e rrugës”, tha Duka.
Kreu i FSHF-së vlerësoi organizimin e ndeshjes dhe ndikimin pozitiv të ndryshimit të stadiumit, ndërsa shtoi se edhe përballjet e zhvilluara më parë në Tiranë e Elbasan kishin pasur nota të mira. Megjithatë, ai theksoi se ekipi duhet të vazhdojë të përmirësohet në prag të sfidave të ardhshme.
Në fund, Duka dha një mesazh të qartë për të ardhmen e pankinës kuqezi:
“Një skuadër fituese nuk diskutohet, një trajner fitues nuk ndërrohet.”
Sa i përket arbitrimit, ai e vlerësoi gjyqtarin si “një prej më të mirëve në Europë”, duke theksuar se ndeshja u drejtua me korrektësi dhe pa ndikime të jashtme.