Shpesh, vështirësitë në frymëmarrje, kollitja apo bllokimi i hundëve ngatërrohen me një ftohje të zakonshme — por në shumë raste, fajtorët e vërtetë janë alergjitë e fshehura në ajër. Substanca të zakonshme si pluhuri i shtëpisë, qimet e kafshëve, myku apo kërpudhat mikroskopike mund të shkaktojnë reaksione të forta alergjike që prekin mushkëritë dhe rrugët e frymëmarrjes.
Një nga shkaktarët më të zakonshëm është kërpudha Aspergillus, që gjendet në gjethe të kalbura apo bimësi të prishura. Ekspozimi ndaj saj mund të shkaktojë një reagim të quajtur aspergiloza bronkopulmonare alergjike (ABPA) — sëmundje që shpesh ngatërrohet me astmën ose pneumoninë.
Simptomat përfshijnë fishkëllimë në gjoks, kollë me sekrecione kafe, ethe dhe vështirësi në frymëmarrje. Trajtimi është i efektshëm, por sëmundja mund të rikthehet nëse ekspozimi vazhdon.
Alveoliti alergjik, është një inflamacion i fshikëzave të ajrit në mushkëri, që shkaktohet nga thithja e grimcave organike si spore, pluhur, qime kafshësh apo jashtëqitje zogjsh. Simptomat përfshijnë kollë, lodhje, temperaturë dhe mungesë fryme.
Një ndër shkaqet më të zakonshme të rinitit alergjik dhe astmës janë merimangat mikroskopike që jetojnë në dyshekë, tepihë e jorganë. Ato lëshojnë proteina që irritojnë rrugët e frymëmarrjes dhe shkaktojnë teshtitje, kruarje të syve dhe hundë të bllokuar.
0Qimet dhe lëkura e kafshëve si qen, mace apo lepuj përmbajnë proteina që mund të shkaktojnë teshtitje, sy të skuqur dhe përkeqësim të astmës te personat e ndjeshëm.
Sporet e mykut, të pranishme në mure të lagështa, banjo apo në natyrë, mund të jenë shkak i kollës së vazhdueshme dhe i bllokimit të frymëmarrjes. Shmangia e lagështisë dhe ajrosja e ambienteve janë masa thelbësore parandaluese.
Ekspozimi i zgjatur ndaj tymit, kimikateve, lateksit apo grimcave industriale në vendin e punës mund të çojë në alergji kronike që ngjajnë me bronkitin apo astmën.