Këshilli i Ministrave ka miratuar sot ndryshime në ligjin “Për mbrojtjen e prokurorëve dhe gjyqtarëve të institucioneve të posaçme”, duke shtuar periudhën e mbrojtjes fizike për disa prej zyrtarëve më të lartë të drejtësisë.
Sipas vendimit të ri, drejtuesi i Prokurorisë së Posaçme (SPAK), Altin Dumani, do të vijojë të ketë mbrojtje personale me truproja të nivelit bazë dhe të mesëm për tre vite pas përfundimit të mandatit të tij.
Ndërkohë, kreu i Gjykatës së Posaçme (GJKKO), Erjon Bani, si dhe drejtoresha e Byrosë Kombëtare të Hetimit (BKH), Aida Hajnaj, do të përfitojnë dy vite mbrojtje me truproja pas largimit nga detyra.
Ndryshimi kryesor në ligj:
Më herët, ligji parashikonte që të gjithë drejtuesit e SPAK, GJKKO dhe BKH të kishin mbrojtje vetëm për një afat jo më shumë se 2 vjet pas përfundimit të mandatit. Me vendimin e ri, vetëm për drejtuesin e SPAK ky afat zgjatet në 3 vjet, duke reflektuar ndjeshmërinë e lartë të detyrës dhe rreziqet që mund të shoqërojnë ish-kreun e strukturës antikorrupsion edhe pas përfundimit të mandatit.
Policia e Shtetit dhe Garda do të përcaktojnë mënyrën e zbatimit të kësaj mbrojtjeje.