Para samitit të liderëve evropianë që do të mbahet më 1 dhe 2 tetor në Kopenhagen, SHBA ka dërguar pajisje speciale për të përballuar mjetet ajrore pa pilot, njoftoi Ministria e Mbrojtjes e Danimarkës.
Disa vende evropiane tashmë kanë ofruar mbështetje Danimarkës pas fluturimeve të përsëritura të dronëve ditët e fundit. Ministria daneze falënderoi SHBA-të për ndihmën, duke e quajtur atë një kontribut të rëndësishëm për sigurinë e samitit.
Për shkak të rrezikut të sabotimeve dhe sulmeve hibride, Danimarka e ka ngritur nivelin e alarmit për impiantet energjetike në portokalli, duke rritur mbikëqyrjen dhe kufizimet e aksesit. Presidenti ukrainas, Volodymyr Zelensky, njoftoi se një ekip ushtarak ukrainas është në vend për të ndarë përvojën e përballjes me dronët rusë përmes ushtrimeve të përbashkëta.
Danimarka ka pësuar së fundmi sulme hibride, duke përfshirë fluturime të përsëritura mbi aeroportet e saj, përfshirë Aeroportin e Kopenhagenit, dhe mbi instalime ushtarake nga dronë të paidentifikuar. Qeveria daneze ka ndaluar fluturimet civile me dronë deri më 3 tetor për të garantuar sigurinë e samitit.
Kryeministrja daneze, Mette Frederiksen, deklaroi se Rusia paraqet kërcënimin kryesor për sigurinë e Evropës. Herën e fundit që Danimarka ngriti nivelin e alarmit për objektet energjetike ishte në shtator 2022, pas sabotimit të tubacionit Nord Stream në Baltik.