Serbia po përgatit funksionalizimin e shërbimit ushtarak të detyrueshëm, por kjo është e papranueshme për shqiptarët, shumicë në Luginë të Preshevës.
Ragmi Mustafi, këshilltar komunal në Bujanoc, thekson se ushtria serbe nuk i përfaqëson shqiptarët, duke kujtuar dhunën dhe abuzimet e së kaluarës: “Çfarëdo nisme për rekrutimin e shqiptarëve është e papranueshme. Ajo ushtri përfaqëson ata që kanë ushtruar dhunë mbi komunitetin tonë.”
Deputeti Shaip Kamberi ka propozuar krijimin e një Komisioni të posaçëm për të hetuar vdekjet e ushtarëve shqiptarë në radhët e Ushtrisë Popullore të Jugosllavisë gjatë viteve ’80. Nisma synon të zbardhë të vërtetën për 135 vdekje që u raportuan si “aksidente” apo “vetëvrasje”, por për familjarët dyshimet mbeten të mëdha për shkak të shenjave të dhunës.
Mustafi shton se njohja e së kaluarës është thelbësore për të ndërtuar paqen dhe një të ardhme të drejtë për komunitetin shqiptar. Megjithatë, realizimi i kësaj nisme shihet si i vështirë, ndërsa rëndësia mbetet që zëri i shqiptarëve të dëgjohet dhe të vihet në dukje për komunitetin ndërkombëtar.