Elisabeta Xhepexhiu, Drejtore e Shërbimeve Sociale pranë Bashkisë Gramsh, ka deklaruar në prokurori se është viktimë e mashtrimeve përmes skemave piramidale online dhe se ka humbur para duke përdorur platformën XUEX, e cila nuk njihet nga autoritetet shqiptare.
Xhepexhiu tregon se për herë të parë ka dëgjuar për platformën gjatë një dreke festive më 8 mars, kur dy kolege të saj, Ermira Perisnaka dhe Jolanda Llapushi, po përdornin aplikacionin. Kur u interesua, ajo mësoi se platforma funksiononte në bazë të klikimit të një pike jeshile dy herë në ditë dhe se kjo gjeneronte të ardhura online.
Pas bisedës, ajo hulumtoi në internet dhe mësoi se persona të tjerë nga Gramshi ishin pjesë e platformës, ndërsa investimi kryhej me kriptomonedha. Xhepexhiu dhe kolegia e saj Anita Duzha vendosën të regjistroheshin. Elisabeta investoi 1000 euro si kapital fillestar, prej të cilave 3000 euro i kaloi në llogarinë në Binance, ndërsa rreth 5000 euro mbeten ende në platformë pa tërhequr.
Për të provuar tërheqjen, Xhepexhiu kaloi 100 USDT në bankë te Raiffeisen Bank dhe mori rreth 7600 lekë. Ajo nuk ka bërë më tërheqje të tjera, ndërsa në llogarinë Binance aktualisht ka 3014 USDT.
Në lidhje me ftesën e personave të tjerë, Xhepexhiu sqaroi se nuk ka pasur ndërmjetësim të qëllimshëm për përfitime, por pasi platforma u bë virale në Gramsh, ajo u shpjegoi disa të afërmve, përfshirë bashkëshortin, motrën, çunin e xhaxhait dhe kunatin, mënyrën e përdorimit. Motrës së saj të divorcuar ajo i transferoi tarifën për regjistrim për ta ndihmuar, duke menduar se gjithçka ishte ligjore, pasi investimi dhe tërheqja ishin të deklaruara.
Xhepexhiu theksoi se nuk kishte dijeni se përmes linkut të dërguar do të kishte përfitime për regjistrimet e personave të tjerë dhe e konsideronte aktivitetin si të sigurt dhe ligjor.