Presidenti serb Aleksandar Vuçiç deklaroi nga Pekini se ka shfrytëzuar pjesëmarrjen në paradën ushtarake kineze për të parë nga afër armatime që mund të blihen për forcimin e ushtrisë serbe.
“Nuk është rastësi që Prishtina, Tirana dhe Zagrebi formuan një aleancë ushtarake. Ata e bënë kundër Serbisë. Ne nuk do ta prekim askënd, por duam të ruajmë integritetin tonë territorial”, tha Vuçiç.
Ai theksoi se Serbia nuk është e interesuar për raketa balistike apo hipersonike, por për avionë shumëfunksionalë dhe helikopterë modernë. Vuçiç njoftoi gjithashtu se ka zhvilluar takime me 11 kompani kineze në fushën e energjisë, teknologjisë dhe mbrojtjes, përfshirë edhe projekte me inteligjencë artificiale dhe prezantimin e makinave fluturuese në Serbi deri në vitin 2027.
Deklaratat e tij vijnë pas marrëveshjes së nënshkruar më 18 mars në Tiranë mes Shqipërisë, Kosovës dhe Kroacisë për rritjen e bashkëpunimit në fushën e mbrojtjes, që sipas qeverisë kroate nuk është aleancë ushtarake, por marrëveshje bashkëpunimi.