Një goditje e rëndë nga nxehtësia u tregua fatale për një djalë 4-vjeçar, pjesëtar i një familjeje turistësh me origjinë moldave, gjatë pushimeve në Olmedo, provinca e Sassarit në Itali. Vogëlushi, duke përfituar nga një moment pushimi i prindërve, u largua nga banesa dhe u gjet pa ndjenja brenda makinës familjare, e parkuar nën diellin e nxehtë të datës 6 gusht.
Temperaturat e larta dhe ambienti i mbyllur shkaktuan rritjen e shpejtë të temperaturës trupore, duke çuar në një kolaps të rëndë shëndetësor. Pas një trajtimi fillestar në repartin e terapisë intensive në spitalin Santissima Annunziata në Sassari, gjendja e tij mbeti kritike. Më 8 gusht, u transportua urgjentisht me helikopter në Spitalin Policlinik Gemelli në Romë, ku qëndroi në koma për shkak të dëmtimeve të pariparueshme në tru, deri në mëngjesin e 11 gushtit, kur mjekët konfirmuan ndërrimin e tij të jetës.
Sipas Karabinierëve të Kompanisë së Algheros, djali u largua nga shtëpia pa e vënë re familja, e cila në atë moment po pushonte. Pas disa minutash mungese, prindërit nisën kërkimet pranë banesës dhe gjetën tragjikisht fëmijën të shtrirë në sediljet e makinës, e mbyllur dhe nën diell me temperaturë brenda makinës mbi 50 gradë Celsius. Ndihma mjekësore u kërkua menjëherë.
Vogëlushi u nxor nga makina dhe iu dha kujdesi i parë nga stafi i urgjencës 118, i cili filloi menjëherë manovrat e reanimacionit. Ai u dërgua me urgjencë në spitalin Santissima Annunziata, ku u shtrua në terapi intensive pediatrike. Për shkak të gjendjes së rënduar, u kërkua transferimi me helikopter në Policlinikun Gemelli në Romë, ku trajtimi vazhdoi në repartet e specializuara, por dëmtimet neurologjike rezultuan të pariparueshme.
Prokuroria e Romës ka hapur një hetim për të sqaruar rrethanat e ngjarjes dhe për të përcaktuar përgjegjësitë e mundshme. Autoritetet po rindërtojnë kohën e largimit dhe gjetjes së fëmijës, si dhe kushtet e sigurisë në banesë. Aktualisht nuk janë marrë masa kufizuese, por hetimet vazhdojnë intensivisht.