Gjermania ndalon eksportet ushtarake në Izrael mes shqetësimeve për Gazën
Qeveria gjermane ka vendosur të ndalojë eksportet e pajisjeve ushtarake drejt Izraelit, si përgjigje ndaj planit të Tel Avivit për të zgjeruar operacionet ushtarake në Rripin e Gazës.
Kancelari Friedrich Merz deklaroi se asnjë autorizim i ri nuk do të jepet për pajisje që mund të përdoren në këtë zonë konflikti, duke theksuar shqetësimin e thellë të Berlinit për vuajtjet e popullsisë civile.
“Me ofensivën e planifikuar, qeveria izraelite mban përgjegjësi edhe më të madhe se më parë për furnizimin e tyre,” tha Merz, duke shtuar se Gjermania i kërkon gjithashtu Izraelit të ndalë çdo hap drejt aneksimit të Bregut Perëndimor.
Në qendër të prioriteteve të Berlinit mbetet lirimi i pengjeve dhe arritja e një armëpushimi të qëndrueshëm.
Sipas të dhënave të publikuara në parlamentin gjerman, mes tetorit 2023 dhe majit 2025, janë lëshuar licenca eksporti për armë dhe pajisje ushtarake drejt Izraelit në vlerën e 485 milionë eurove.