Avokati i Ardian Isufit, policit që goditi me shpulla kamerierin 18-vjeçar Ron Balaj në një lokal në Vlorë, ka publikuar pamje të tjera që sipas tij tregojnë dhunën e ushtruar ndaj klientit të tij pas incidentit.
Në reagimin e tij, avokati Kujtim Cakrani pretendon se polici u rrah nga 15 persona jashtë lokalit dhe se në video “dallohen qartë” dhunuesit. Sipas tij, reagimi ndaj klientit të tij ishte i tepruar, pasi “ai i futi vetëm dy shpulla djalit”, ndërsa më pas u sulmua me mjete të forta.
Pamjet e publikuara nuk tregojnë qartë momentin e konfrontimit, por shfaqin një grup personash në tension jashtë ambientit të lokalit. Cakrani thekson se policia duhet të ndalojë personat e përfshirë dhe të zbardhë të gjithë dinamikën e ngjarjes.
Avokati nuk bëri koment mbi dhunën e ushtruar ndaj 18-vjeçarit, duke këmbëngulur se rrahja e klientit të tij nga disa persona është “fakti kryesor” që po neglizhohet.
Reagimi i plotë i avokatit:
Meqë policia e shtetit nuk arriti të administronte pamjet filmike për të zbardhur ngjarjen e ndodhur në ambientet e një lokali në qytetin e Vlorës dy ditë më parë, ku u dhunua një punonjës shumë i nderuar i policisë shtetit, atëherë po ja u vendos unë momentet e dhunës ushtruar ndaj policit.
Në video dallohen qartë personat që kanë dhunuar policinë, që në fakt nuk kanë qenë as dy as tre por 15 persona me mjete të forta.
Qytetarët janë bërë preha e një video të shkurtër të publikuar në media ku dallohet që është goditur .e shpulla një kamerier, por qëllimisht është fshehur pjesa tjetër e ngjarjes.
Pamjet që më kanë ardhur mua si avokat I policit janë tronditëse dhe dallohen qartë edhe dhunuesit e tij.
Prandaj policia e shtetit duhet të ndërhyj me ndalimin e dhunuesve dhe të zbardhë dinamikën e ngjarjes.