Në Indi 166 persona kanë vdekur dhe më shumë se 200 të tjerë janë zhdukur pas rrëshqitjeve të dheut në jug të Indisë.
Mediat e huaja raportojnë se shiu i dendur në Kerala, një nga destinacionet më të njohura turistike të Indisë, çoi në përrenj balte, uji dhe shkëmbinjsh, të cilët ‘varrosën’ njerëzit teksa ishin në gjumë.
Është fatkeqësia më e keqe në shtet që nga përmbytjet vdekjeprurëse në 2018 dhe ka të ngjarë të lidhet me ndryshimin e kushteve të Detit Arabik, i cili “po ngrohet me një shkallë më të lartë në krahasim me rajonet e tjera”, paralajmëruan shkencëtarët e klimës.
Autoritetet thanë se gati 1,000 njerëz ishin shpëtuar nga komunitetet në distriktin Ëayanad, i vendosur në vargmalin malor Ëestern Ghats dhe i njohur për plantacionet e tij të çajit.
Zyrtarët shtuan se 195 persona ishin plagosur, ndërsa 225 individë të tjerë janë ende të zhdukur.
Ekspertët thanë se zona kishte parë shira të dendur në dy javët e fundit që kishte zbutur tokën, përpara se reshjet jashtëzakonisht të mëdha të hënën të shkaktonin rrëshqitje të dheut.
India ka qenë dëshmitare e kushteve ekstreme të motit, duke përfshirë shiun e rrëmbyeshëm, përmbytjet, thatësirat dhe ciklonet, në vitet e fundit, me shumë ekspertë që fajësojnë ndryshimet klimatike për ngjarjet.
