Platforma X, në pronësi të Elon Musk, ka akuzuar autoritetet franceze për nisjen e një hetimi penal “me motiv politik”, që sipas saj synon të shtypë lirinë e shprehjes së përdoruesve në rrjet. Në një deklaratë zyrtare, kompania e teknologjisë ka mohuar çdo shkelje të ligjit dhe ka deklaruar se nuk do të bashkëpunojë me drejtësinë franceze.
Hetimet paraprake, të nisura në fillim të korrikut, kanë në fokus dyshimet për manipulim të algoritmeve dhe grumbullim të paligjshëm të të dhënave personale. Policia franceze ka të drejtë të marrë masa të zgjeruara si marrje në pyetje, mbikëqyrje të stafit, kontroll elektronik apo edhe urdhër-arreste në rast mosbashkëpunimi.
Sipas X, kërkesat për dorëzimin e të gjitha postimeve të përdoruesve për analizë nga studiues “me qasje armiqësore ndaj kompanisë”, përbëjnë një shkelje serioze të parimeve demokratike.
“Kemi arsye të besojmë se ky hetim po përdor ligjin francez në mënyrë të shtrembëruar, për të ndjekur një agjendë politike dhe për të kufizuar lirinë e fjalës,” thuhet në reagimin e X.
Autoritetet franceze e kanë bazuar hetimin mbi ligjin kundër krimit të organizuar, i cili lejon ndërhyrje të thelluara, përfshirë mbikëqyrjen e pajisjeve elektronike të punonjësve të X në Francë.
Deputeti Éric Bothorel, një nga kritikët më të zëshëm të platformës, ka deklaruar se “liria e shprehjes nuk është absolute”, duke mbrojtur integritetin e hetimit dhe pavarësinë e drejtësisë.
Ky rast pritet të përkeqësojë më tej marrëdhëniet mes Shteteve të Bashkuara dhe Bashkimit Europian sa i takon rregullimit të platformave online. Paralelisht, Komisioni Europian po zhvillon një hetim të veçantë ndaj X për shkelje të ligjeve të BE-së kundër përmbajtjes së paligjshme në internet.