Pas më shumë se dy dekadash arrati, një 56-vjeçar shqiptar u ekstradua sot nga Shqipëria drejt Italisë, ku do të vuajë një dënim përfundimtar prej 25 vitesh burg për vepra të rënda penale, përfshirë rrëmbim, trafik droge dhe armëmbajtje pa leje.
I dënuari, i konsideruar një figurë kyçe në një organizatë ndërkombëtare të trafikut të drogës që operonte ndërmjet Amerikës së Jugut, Shqipërisë dhe Italisë, u arrestua fillimisht në Tiranë në mars të vitit të kaluar pas një kërkimi të gjatë nga autoritetet italiane dhe amerikane.
Ai ishte arratisur nga drejtësia që në fund të viteve ’90, pasi kishte shmangur arrestimin pas shkatërrimit të grupit kriminal ku bënte pjesë. Për t’i shpëtuar ndjekjes penale, ai kishte falsifikuar dokumentet dhe madje edhe vdekjen e tij, duke u zhdukur në SHBA për më shumë se 20 vjet.
Shqiptari u lokalizua përmes bashkëpunimit të Interpolit me autoritetet amerikane. Pas dëbimit nga SHBA në Shqipëri, ai u arrestua në aeroportin e Tiranës nga njësitë speciale të policisë (RENEA), në kuadër të procedurës për ekstradim drejt Italisë.
Sot, nën shoqërimin e Shërbimit Ndërkombëtar të Bashkëpunimit Policor të Italisë, ai zbarkoi në Aeroportin Fiumicino të Romës, ku do të përballet me vuajtjen e dënimit të dhënë nga Gjykata e Apelit e Salernos.