Një 38-vjeçar nga Tirana është vënë nën hetim nga Policia e Sarandës, pasi dyshohet se tentoi të korruptonte efektivët e Policisë Rrugore me 50 euro, për të shmangur një masë ndëshkuese pas një shkeljeje të qarkullimit.
Sipas njoftimit zyrtar, ngjarja ndodhi në rrugën “Lefter Talo”, ku shërbimet e Forcës së Posaçme “Shqiponja” konstatuan një automjet tip “BMW” të ndaluar në mënyrë të parregullt, duke penguar qarkullimin e lirë të mjeteve të tjera.
Gjatë verifikimeve, drejtuesi i mjetit, shtetasi L. B., ka tentuar të ofrojë 50 euro ndaj punonjësve të policisë, në përpjekje për të shmangur ndëshkimin ligjor për shkeljen e konstatuar.
Ai u shoqërua në ambientet e Komisariatit të Policisë Sarandë, ndërsa Prokuroria pranë Gjykatës së Shkallës së Parë të Juridiksionit të Përgjithshëm Sarandë ka nisur procedimin penal ndaj tij në gjendje të lirë, për veprën “Korrupsioni aktiv ndaj personave që ushtrojnë funksione publike”.