Një ngjarje e rëndë është zbuluar pranë liqenit të Shkopetit, ku është gjetur i pajetë një i ri 23-vjeçar, i identifikuar si Renis Dobra. I riu ishte shpallur në kërkim nga familja, pasi babai i tij kishte raportuar zhdukjen disa ditë më parë.
Dyshimet e para flasin për një rrëmbim të mundshëm në qytetin e Burrelit, që më pas mund të ketë përfunduar me vrasje. Trupi i pajetë është zbuluar nga një banor i zonës, i cili ka njoftuar menjëherë autoritetet.
Në vendngjarje kanë mbërritur prokurori i Dibrës dhe ekspertë të kriminalistikës nga Tirana, ndërsa zona është rrethuar nga forcat e policisë. Ende nuk është përcaktuar zyrtarisht shkaku i vdekjes së të riut, teksa hetimet po vijojnë në disa pista.