Një operacion i gjerë ndërkombëtar i zhvilluar nga Europol, në bashkëpunim me autoritetet italiane, spanjolle dhe shqiptare, ka çuar në arrestimin e 28 anëtarëve të organizatës famëkeqe mafioze ’Ndrangheta, përfshirë edhe një grup shqiptar.
Në qendër të hetimit ishte një shtetas italian nga Kalabria dhe tre djemtë e tij, të cilët kishin ngritur një rrjet kriminal për trafikun e kokainës dhe hashashit, duke bashkëpunuar ngushtë me shqiptarët, të cilët menaxhonin logjistikën e dërgesave që vinin nga Amerika Latine përmes porteve në Spanjë dhe Holandë, për të përfunduar në Gioia Tauro (Kalabri).
Shqiptarët kishin gjithashtu rol në shitjen e lëndëve narkotike në Romë. Në total, rrjeti dyshohet se ka trafikuar mbi 1 ton kokainë dhe 1.5 ton hashash në të paktën 80 episode të ndryshme.
Hetimet zbuluan gjithashtu një ngjarje të rëndë dhune: katër italianë akuzohen se rrëmbyen dhe torturuan një trafikant droge – akt që u regjistrua me video dhe u shpërnda për të frikësuar dhe kontrolluar anëtarët e tjerë të rrjetit.
Europol mbështeti operacionin me analiza financiare, verifikime të të dhënave dhe koordinim ndërkombëtar, çka çoi edhe në pesë arrestime në Spanjë gjatë fazës hetimore.