Kupa e Botës 2026 pritet të shënojë një rekord të ri financiar për FIFA-n, me organizatën që parashikon të ardhura prej më shumë se 13 miliardë dollarësh gjatë ciklit katërvjeçar të turneut.
Fillimisht, FIFA kishte projektuar të ardhura rreth 11 miliardë dollarë, por vlerësimet më të fundit tregojnë se kjo shifër do të tejkalohet, duke e bërë Botërorin e vitit 2026 më fitimprurësin në historinë e futbollit.
Rritja e të ardhurave lidhet me zgjerimin e kompeticionit nga 32 në 48 skuadra, çka do të sjellë zhvillimin e 104 ndeshjeve, si dhe me interesin e lartë global, të drejtat televizive, marrëveshjet e sponsorizimit, aktivitetet tregtare dhe të ardhurat nga shitja e biletave.
Për krahasim, cikli i Kupës së Botës 2022 në Katar gjeneroi rreth 7.5 miliardë dollarë të ardhura, ndërsa edicioni i vitit 2026, që do të organizohet në Shtetet e Bashkuara, Kanada dhe Meksikë, pritet ta tejkalojë ndjeshëm këtë rekord.
Ndërkohë, FIFA po shqyrton edhe mundësinë e një zgjerimi të mëtejshëm të Kupës së Botës 2030, nga 48 në 64 skuadra. Nëse ky propozim miratohet, turneu do të përfshinte edhe më shumë ndeshje dhe tregje televizive, duke rritur më tej potencialin ekonomik të kompeticionit më prestigjioz të futbollit botëror.