Friedrichshafen, 7 korrik 2025 – Një incident ajror ka shkaktuar panik këtë të hënë në një nga aeroportet e Gjermanisë, kur një avion i linjës ajrore Swiss International Airlines, pjesë e grupit Deutsche Lufthansa, u detyrua të bënte një ulje emergjente në aeroportin Friedrichshafen. Avioni po udhëtonte në linjën Beograd–Cyrih, kur ekuipazhi raportoi praninë e tymit në pjesën e pasme të kabinës.
Sipas mediave gjermane, tymi u dallua gjatë fluturimit, duke krijuar ankth tek pasagjerët dhe duke shtyrë pilotët të kërkojnë ulje të menjëhershme në aeroportin më të afërt. Për fat të mirë, ulja u realizua në mënyrë të sigurt dhe pa incidente të tjera, ndërsa pasagjerët u evakuuan menjëherë pas ndalimit të avionit, përmes autobusëve të vendosur në dispozicion nga autoritetet aeroportuale.
Zëdhënës të Swiss kanë konfirmuar se asnjë person nuk ka pësuar lëndime dhe se të gjitha procedurat e sigurisë janë ndjekur sipas protokollit. Ndërkohë, hetimet për shkaqet e incidentit janë duke u zhvilluar nga autoritetet gjermane dhe përfaqësues të kompanisë ajrore.