Kreu i Partisë së Lirisë, Ilir Meta, nga burgu ku ndodhet, ka zbuluar se para arrestimit të tij kishte marrë paralajmërime të shumta nga miq dhe bashkëpunëtorë ndërkombëtarë për mundësinë e ndalimit të tij me urdhër të Prokurorisë së Posaçme (SPAK). Gjatë një interviste për Syri.net, Meta tregon se i është ofruar edhe mundësia për të kërkuar azil politik në disa vende të BE-së dhe NATO-s, por e ka refuzuar këtë opsion.
“Nuk mund të realizoj ëndrrën e armiqve të vendit tim dhe mercenarëve të tyre, nga Rama e deri tek veglat në drejtësi e gjetkë. Nëse do kishin një provë apo fakt penal ndaj meje, nuk do të kishin inskenuar atë rrëmbim mafioz që do të hyjë si precedenti më skandaloz në historinë e Gjykatës së Strasburgut,” deklaroi Meta.
Ai shton se që pas largimit të Arben Ahmetajt nga Shqipëria, SPAK vazhdimisht i ka ushqyer mediat me lajme për arrestimin e tij. “Çdo javë, Z. Dumani thërriste gazetarë duke u thënë se këtë javë arrestohet Meta, se ka ardhur porosia nga një shtet apo nga ndonjë ishull,” rrëfen ai.
Meta kujtoi edhe incidentin e 21 tetorit 2023, kur ndodhej në Austri për vizita mjekësore, në të njëjtën kohë kur ndodhi arrestimi i Jamarbër Malltezit dhe sulmi ndaj Sali Berishës. Një bashkëpunëtor i ish-agjentit të FBI-së, Charles McGonigal, sipas Metës, e kishte paralajmëruar përmes një ndërmjetësi se qëllimi përfundimtar ishte arrestimi i tij.
“Pata shumë telefonata ku më sugjeronin të mos kthehesha. Edhe gazetarë dashamirës më këshilluan të prisja disa ditë, por i informova që do të kthehesha menjëherë, dhe ashtu bëra.”
Duke komentuar qëllimet e arrestimit, Meta theksoi se me burgosjen e tij janë arritur disa objektiva afatshkurtra të qeverisë Rama: “Izolimi im ekstrem, dobësimi i opozitës në publik, frikësimi i njerëzve. Por në afatgjatë, fitorja do të jetë e imja dhe e gjithë patriotëve.”
Meta akuzon se hetimet ndaj tij, të nisura nga SPAK që në dhjetor 2019 me porosi politike, po zvarriten qëllimisht për të vonuar procesin gjyqësor themelor.