Faqja zyrtare e Bashkisë Tiranë ka rënë pre e një sulmi kibernetik nga grupi iranian “Homeland Justice”, duke dalë jashtë funksionit këtë të premte. Lajmi është konfirmuar nga Autoriteti Kombëtar për Sigurinë Kibernetike (AKSK), i cili bën të ditur se sulmi është izoluar dhe aktualisht po punohet për rikthimin e funksionimit normal të sistemeve.
Sipas AKSK, sulmi ka prekur disa nga infrastrukturat dhe sistemet e informacionit të bashkisë, duke ndërprerë përkohësisht shërbime të ndryshme, përfshirë edhe regjistrimin e fëmijëve në çerdhe dhe kopshte — një proces që ishte planifikuar të përmbyllej më 22 qershor.
“Menjëherë pas konstatimit të incidentit, është ngritur një grup pune me ekspertë të sigurisë kibernetike, në bashkëpunim me Policinë e Shtetit dhe stafin teknik të Bashkisë Tiranë, për të analizuar sulmin, kufizuar përhapjen e tij dhe nisur rikthimin e sistemeve në funksion,” thuhet në njoftimin e AKSK-së. Autoriteti thekson se po kryhet edhe analiza e malware-t dhe po merren masa për forcimin e sigurisë në infrastrukturën kritike.
Ndërkohë, grupi “Homeland Justice” ka marrë përgjegjësinë për sulmin përmes një postimi në rrjetin Telegram, duke e lidhur aktin me mbështetjen që Shqipëria i jep organizatës opozitare iraniane të muxhahedinëve (MEK), të strehuar në Manzë të Durrësit që prej vitit 2013.
Autoriteti Kombëtar për Sigurinë Kibernetike dënoi ashpër çdo akt që cënon infrastrukturën kritike të informacionit në Shqipëri, duke siguruar opinionin publik për angazhimin e vazhdueshëm në mbrojtjen e sistemeve shtetërore.