Me 72 vota pro dhe 1 kundër, Kuvendi miratoi sot ligjin “Për performancën energjetike të ndërtesave”, duke e bërë Shqipërinë vendin e parë në rajon që zbaton plotësisht direktivën më të fundit të Bashkimit Evropian në këtë fushë.
Ligji synon që deri në vitin 2050 të gjitha ndërtesat, publike dhe private, të kthehen në struktura me konsum minimal energjie, përmes standardeve të reja ndërtimi dhe rinovimi.
Risia kryesore është futja e librezës së rinovimit të ndërtesës, e cila do të ndihmojë qytetarët të investojnë në përmirësime energjetike. Fokus i veçantë i nismës janë familjet me të ardhura të ulëta, që do të përfitojnë nga skemat e mbështetjes.
Objektet e reja dhe ato që do të rinovohen do të duhet të jenë të pajisura me panele diellore dhe pika inteligjente për karikimin e makinave elektrike.
Shqipëria ka përmirësuar ndjeshëm bilancin energjetik, duke ulur humbjet në rrjet nga 50% në vitin 2013 në 18% aktualisht, ndërsa nga 1 shkurti 2025, çmimi i energjisë për konsumatorët familjarë ulet me 10.5%, duke përfshirë rreth 1.07 milionë familje.