VENEZUELË– Zgjedhjet presidenciale në Venezuelë janë fituar nga Presidenti Nicolas Maduro. Maduro ka siguruar mandatin e tij të tretë, sipas rezultateve të publikuara nga këshilli zgjedhor i vendit. Me 80% të votave të numëruara, Maduro siguroi 51.20% të votave dhe Gonzalez Urrutia rreth 44%.
Ndërsa më parë opozita siguroi se ka të gjitha arsyet për të “festuar” rezultatin, ndërsa u bëri thirrje mbështetësve të qëndrojnë në qendrat e votimit, për të garantuar transparencën dhe besueshmërinë e numërimit.
“Rezultatet nuk mund të fshihen. Vendi ka zgjedhur në mënyrë paqësore ndryshimin”, siguroi Gonzalez Urrutia përmes X rreth orës 23:00, përpara se të shpalleshin rezultatet.
Maria Korina Machado një figurë drejtuese e opozitës, kërkoi që forcat e armatosura të respektojnë rezultatin e zgjedhjeve.
“Mesazhi për ushtrinë. Populli venezuelian ka folur: ata nuk e duan Maduro-n. Është koha për të qëndruar në anën e duhur të historisë. Ju keni një shans, dhe është tani.”- ka thënë ajo.
Ndërkohë lidhur me ngjarjen qeveria amerikane bëri thirrje për një “numërim të drejtë dhe transparent”, me kreun e diplomacisë amerikane, Anthony Blinken, duke kërkuar që rezultatet të bëhen publike në detaje, si garanci për transparencë dhe llogaridhënie.
“Qeveria amerikane lavdëron popullin venezuelian për pjesëmarrjen në zgjedhjet presidenciale të 28 korrikut, pavarësisht sfidave të mëdha dhe shqetësimeve të thella rreth procesit. Tani që votimi është mbyllur, është jetike që çdo votë të numërohet në mënyrë të drejtë dhe transparente.”– deklaroi Sekretari i Shtetit i Presidentit Joe Biden./BBC