Historia e dashurisë mes presidentit francez Emmanuel Macron dhe bashkëshortes së tij Brigitte ka tërhequr vëmendjen e publikut për vite me radhë, shpesh duke ngjallur kuriozitet e herë pas here edhe debate.
Këtë javë, marrëdhënia e tyre është rikthyer në qendër të mediave pas një episodi që ndodhi në një aeroport në Vietnam, gjatë zbritjes së çiftit nga avioni presidencial.
Historia e tyre nis shumë kohë më parë, kur Emmanuel ishte vetëm 15 vjeç dhe ndiqte një shkollë katolike, ku Brigitte ishte mësuese. Që prej asaj kohe, ata janë treguar të pandashëm. Këtë fakt e konfirmon edhe një biografi e re, e shkruar nga mikja e tyre e afërt Gaël Tchakaloff, e cila i ka ndjekur nga afër për një vit për të realizuar librin e saj me titull Tant Qu’on Est Tous les Deux (“Sa kohë jemi të dy së bashku”).
Në këtë libër theksohet lidhja shumë e ngushtë mes Macron dhe Brigitte. Autorja shkruan se presidenti francez e telefonon bashkëshorten e tij çdo një orë e gjysmë.
Sipas një burimi të afërt me çiftin, Brigitte është thellësisht e përkushtuar ndaj burrit të saj dhe karrierës së tij, duke e ndihmuar në menaxhimin e përditshëm të axhendës. Në shumë aspekte, ajo luan rolin e një këshilltareje jozyrtare.
“Nuk kalon as një orë e gjysmë pa folur me njëri-tjetrin,” thuhet në libër. “Ata ndajnë një orar të përbashkët. E dinë saktësisht çfarë po bën tjetri, minutë pas minute,” vijon më tej.
Edhe pse biografia nuk është zyrtarisht e autorizuar, prej kohësh dihet që Brigitte ka pohuar se nuk i pëlqen të flejë e ndarë nga Emmanuel.