Një video e fundit ku Brigitte Macron, 72 vjeçe, duket se i jep një shuplakë presidentit Emmanuel Macron, 47 vjeç, bëri bujë ndërkombëtare, por historia e çiftit është shumë më e thellë dhe më e njohur.
Historia e tyre filloi në një mënyrë të veçantë: Brigitte ishte mësuesja e Emmanuel-it në shkollën katolike Le Providence. Ajo ishte 39 vjeçe, ai vetëm 15. Kur prindërit e Emmanuel-it zbuluan lidhjen e tyre, ai u dërgua në shkollë me konvikt në Paris, në shpresë se do harronte dashurinë për mësuesen. Por kjo nuk ndodhi.
Ata ruajtën kontakt për më shumë se një dekadë, ndërsa Brigitte ishte e martuar me bankierin Andre-Louis Auziere dhe kishte tre fëmijë. Ajo rrëfeu më vonë se i kishte dhënë shumë rëndësi fëmijëve dhe nuk donte të divorciste derisa ata të ishin rritur.
Në vitin 2006, Brigitte u divorcua dhe një vit më pas u martua me Emmanuelin. Ish-burri i saj ndërroi jetë në 2019.
Në një intervistë për Elle, ajo tregoi se marrëdhënia e tyre është normale, me ngritje dhe ulje si çdo çift tjetër: “Biem dakord, grindemi, por gjithçka është e natyrshme. Është si të kesh gjetur gjysmën tënde më të mirë dhe gjithçka thjesht shkon mirë.”
Brigitte përfundon duke thënë se historia e tyre, pavarësisht ndryshimit të moshës, është thjesht një histori dashurie si çdo tjetër – edhe pse shumëkush e sheh me habi.