Agron Shehaj, kryetar i Partisë Mundësia, ka reaguar ashpër ndaj një skenari që, sipas tij, synon t’i rrëmbejë forcës së tij një nga dy mandatet e fituara më 11 maj. Në një deklaratë publike në rrjetet sociale, Shehaj e cilëson këtë një “përpjekje të dëshpëruar nga partitë e vjetra” që nuk duan ndryshim dhe shprehet i vendosur se “asnjë votë nuk do të preket”.
“Dy mandate. Dy votëbesime. Të ndershme. Të padiskutueshme. Dhe askush nuk do t’i rrëmbejë. Askush”, shkruan ai, duke e quajtur tentativën për të ndryshuar rezultatin zgjedhor një akt hipokrizie.
Shehaj akuzon kundërshtarët politikë se nuk mund të denoncojnë farsën zgjedhore dhe, njëkohësisht, të “vjedhin një mandat në tavolinë”. Ai garanton se çdo votë për Partinë Mundësia është e paprekshme dhe mbetet një votë për ndryshim.
Mesazhi i tij vjen në një moment tensionesh dhe akuzash për manipulime të rezultatit në disa qarqe, ndërsa pritet reagimi i institucioneve zgjedhore mbi kërkesat për rinumërime dhe ankimime.