Kanë kaluar gjashtë ditë nga rrëshqitja masive e dheut në zonën e “Qafës së Burrelit”, pranë fabrikës së pasurimit të kromit në Klos, ku 29-vjeçari Ardit Beshiri u zhduk teksa punonte me ekskavator. Pavarësisht angazhimit të mbi 800 forcave nga institucionet shqiptare dhe kosovare, trupi i të riut ende nuk është gjetur.
Ngjarja ndodhi më 3 maj 2025, rreth orës 14:30, kur një masiv dheu u shkëput në një gjatësi rreth 2 kilometra dhe përfshiu zonën ku ndodhej Beshiri. Rrëshqitja është përhapur në një sipërfaqe prej rreth 6 kilometrash, duke e bërë jashtëzakonisht të vështirë operacionin e kërkim-shpëtimit.
Në terren janë angazhuar dhjetëra struktura shtetërore, përfshirë Autoritetin Kombëtar për Sigurinë dhe Emergjencat në Miniera (AKSEM), Forcat e Armatosura, Policinë e Shtetit, Agjencinë Kombëtare të Burimeve Natyrore, si dhe mbi 500 vullnetarë nga komuniteti lokal. Dy ekskavatorë janë futur në një segment rreth 500 metra nga pika e rrëshqitjes për të ndihmuar në gërmime.
Për shkak të kompleksitetit të situatës, me ndërmjetësimin e Agjencisë Kombëtare të Mbrojtjes Civile, më 7 maj operacionit iu bashkua edhe një ekip i specializuar nga Forca e Sigurisë së Kosovës, i përbërë nga 12 efektivë dhe dy qen kërkimi.
Përpjekjet për të gjetur Ardit Beshirin vijojnë pa ndërprerje, ndërsa autoritetet deklarojnë se operacioni do të vazhdojë deri në momentin e lokalizimit të trupit të pajetë.