Ditën e djeshme u zbardh deklarata e vrasësit të Ilaria Sulës, ish-partnerit të saj Mark Samson.
Mediat italiane raportuan se Samson deklaroi se e gjithë ngjarja e rëndë ndodhi për shkaqe xhelozie.
Pasi i dërgoi ushqimin në krevat, papritmas një mesazh që mbërriti në telefonin e Ilarias, sipas Samson, u bë shkaku se pse ai e ndërmori atë veprim.
“I dërgova mëngjesin në shtrat kur ai mesazh erdhi në telefonin e saj. Dhe ajo më tha se po njihej dikë tjetër, e humba mendjen. Në tabaka ishte edhe thika për të prerë bukën, e mora dhe e vrava. Ajo vdiq menjëherë, nuk u mbrojt.”
Kujtojmë se mbrëmjen e 25 marsit, studentja shqiptare mbërriti në via Homs, në lagjen afrikane të Romës, ku Mark jetonte me nënën dhe babanë e tij, për t’i kthyer rrobat e mbetura. Duke qenë se ajo qëndroi deri në orë të vona të natës, vendosi që të flinte aty nga frika se nëse nisej në atë orar diçka e keqe mund t’i ndodhte nëse përdorte transport public.
Mark rrëfeu se vrasja ka ndodhur për shkak të xhelozisë dhe se e ka pastruar gjithçka vetë. Ndërsa më tej autori i vrasjes makabër nuk ka pranuar që t’u përgjigjet pyetjeve për praninë e prindërve të tij në shtëpi dhe rolin e tyre të mundshëm.
“Pasi e vrava, dola dhe shkova të blej detergjentë dhe disa lecka. Më pas e mbështjella trupin me celofan dhe e vendosa në dy qese të mëdha mbeturinash, njërën nga ana e kokës, tjetrën nga ana e këmbëve. E mbështolla, mora valixhen dhe e futa brenda. Kështu që vendosa valixhen jashtë derës së dhomës sime dhe fillova të pastroj njollat e gjakut. Në fund mbështolla gjithçka që kisha përdorur në një qilim, madje edhe thikën, dhe i hodha. Unë i bëra të gjitha vetë.”
Pasi pastroi gjithçka, Mark pretendon se e kishte vendosur valixhen në makinë dhe u nis drejt rrugës për në Capranica, ku hodhi valixhen me trupin nga një shkëmb.
Mirëpo autopsia nxorri në pah se Ilaria e kishte stomakun bosh, detaj që tregon se vrasja ka ndodhur gjatë mbrëmjes, edhe pikëpyetja tjetër është se Ilaria pasi kishte vendosur t’i jepte fund lidhjes, nuk ka gjasa që të ketë zgjedhur të qëndronte dhe të flinte me ish-in e saj.
Jo vetëm kaq, fakti që në makinë nuk u gjetën gjurmë gjaku, lë të kuptohet se gjaku ishte tharë.