KOÇAN– Janë zbardhur detaje të reja sa i takon zjarrit të rënë në klubin e natës në Koçan ku mbetën të vdekur 59 persona. Një nga të mbijetuarat e zjarrit është 20-vjeçarja, Marija Taseva. Ajo ka shpjeguar momentet e largimit nga zjarri teksa theksoi se të gjithë po vraponin të shpëtonin veten.
20-vjeçarja arriti të dilte e gjallë ndërsa fati i motrës së saj nuk dihet ende. Më tej ajo theksoi se nuk po e gjejnë në asnjë spital dhe se po presin për ndonjë informacion.
Taseva tha se teksa po largohej nga vendi i ngjarjes ra në tokë dhe të tjerët po e shkelnin. Fatmirësisht ajo nuk ka marrë plagë të rënda.
“Të gjithë filluan të vrapojnë jashtë. Të gjithë përpiqeshin të shpëtonin veten. Motra ime ka humbur. Nuk mund ta gjejmë në asnjë spital. Tani presim këtu rezultatet për të parë nëse do ta gjejmë, nëse jo, përfundimisht në Shkup. Duke dalë jashtë rashë në tokë dhe të tjerët më shkelnin, thjesht me faqe isha në tokë.”-u shpreh Taseva.
Ndërkohë i ati i saj deklaron se nuk kanë informacion për vajzën e dytë, e cila është 25 vjeçe.
Policia ka arrestuar disa persona për këtë ngjarje tragjike. Paraprakisht dyshohet se shkak i zjarrit në diskotekë është bërë hedhja e mjeteve piroteknike./Radar.al