DURRËS– Prej gati një jave qyteti i Durrësit është i përmbytur si shkak i reshjeve të dendura të shiut.
Ndërkohë që në disa zona situata është përmirësuar, në Njësinë Administrative Sukth të qytetit të Durrësit gjendja mbetet ende problematike.
Të paktën 5000 hektarë tokë bujqësore janë përmbytur, ndërsa lagjet 2, 3, 4 janë nën ujë.
Sipas Shtabit të Emergjencave të qarkut Durrës, situata është përkeqësuar edhe në Katundin e Ri dhe në zonën e Sukthit, si pasojë e daljes nga shtrati të lumit Erzen dhe çarjes së argjinaturës. Për pasojë, fshatrat Erzen dhe Fllakë janë përmbytur, ndërsa zona e Qerretit paraqitet në rrezik përmbytjeje.
Bëhet me dije se, strukturat e emergjencës po monitorojnë nga afër situatën dhe po marrin masa për të garantuar sigurinë e banorëve dhe për të minimizuar dëmet./Radar.al