Një operacion i përbashkët i Policisë së Durrësit dhe asaj të Tiranës është zhvilluar për zbatimin e masave të sigurisë të vendosura nga gjykata në lidhje me çështjen e mbetjeve të rrezikshme të kompanisë “Kurum”.
Hetimet lidhen me eksportimin e 102 kontejnerëve me mbetje të rrezikshme drejt Tajlandës, të cilët u kthyen më pas në Shqipëri pas një sinjalizimi nga Rrjeti i Bazelit.
Sipas burimeve zyrtare, janë firmosur gjithsej 33 masa sigurie ndaj personave të dyshuar për përfshirje në këtë aferë, mes tyre drejtues të kompanisë “Kurum”.
Nga këto masa, 26 janë “arrest me burg” dhe 7 “arrest shtëpie”. Në arrest shtëpie është vendosur edhe Arta Dollani, ish-drejtoreshë e Agjencisë Kombëtare të Mjedisit (AKM).
Masa sigurie janë lëshuar gjithashtu për biznesmenë dhe zyrtarë të AKM-së dhe Doganave, të dyshuar për rol në lejimin dhe menaxhimin e paligjshëm të mbetjeve të rrezikshme.