Interesi për një vend pune në administratën publike vijon të rritet, por konkurrenca mbetet e fortë dhe jo të gjithë arrijnë të kalojnë fazën e parë.
Sipas raportit të Departamentit të Administratës Publike për vitin 2025, për 949 pozicione të shpallura janë regjistruar mbi 19 mijë aplikime, duke prodhuar mesatarisht rreth 20 kandidatë për çdo vend pune. Megjithatë, vetëm 44.7% e aplikimeve janë konsideruar të vlefshme dhe kanë kaluar për në fazat e mëtejshme të përzgjedhjes.
Në fund të procesit, janë plotësuar 654 vende pune, çka tregon se një pjesë e konsiderueshme e pozicioneve mbeten të paplotësuara edhe për shkak të mosplotësimit të kritereve nga kandidatët.
Një tjetër tregues interesant është se aplikantët nuk kufizohen në një mundësi të vetme: mesatarisht, secili ka aplikuar për 5 pozicione të ndryshme.
Profili i aplikantëve:
- 63% e aplikantëve janë gra
- Mosha mesatare: 33 vjeç
- Mosha mesatare për ngritje në detyrë: 38 vjeç
Largimet nga administrata:
Gjatë vitit 2025 janë regjistruar 266 largime nga detyra, kryesisht për shkak të dorëheqjeve dhe daljeve në pension. Megjithatë, krahasuar me vitin 2024, numri i largimeve ka rënë me 32.8%.
Disiplina në administratë:
Janë dhënë 36 masa disiplinore, që përfshijnë:
- Ulje page deri në 1/3 për 6 muaj
- Pezullim deri në 2 vite
- Vërejtje
Mbi 66% e procedimeve disiplinore janë nisur me rekomandim nga eprorët, ndërsa pjesa tjetër nga strukturat antikorrupsion dhe auditet financiare.